البوست اللي فات قلت فيه قطع الجواز و سيرته
وكبرت دماغي من ام الموضوع ده بقي
هفضل احرق دمي علي ايه
محدش يستاهل
و قلت يا بت يا دودو اثبتي نفسك في الشغل بقي
عايزاكي تبقي بلانر اه و الله بلانر و مين عارف مش يمكن قريب تبقي مديره
اه وليه لا ابقي مديره علي العيال دول
ويبقي كل اللي تحت ايدي رجاله
اه رجاله مخطوبين او متجوزين
اقوم انا بقي اطلع عقدي عليهم و اطلع عنيهم
و اخلص طاري من الجنس الاخر
و تحولت كل احلامي من تكوين اسره و بيت وزوج تحولت الي احلام كيف تنتقمين من الجنس الاخر
و عشان ابقي مخططه مشاريع ناجحه قلت لازما ولابد اخد كورسات في المجال ده
ومكدبتش خبر
باخد كورسات ادعولي بقي انجح فيها
و نسييييييييت مشوار الجواز ده خالص
انا نسيت لكن اللي حواليا منسيوش
بس افوق من الكورس وديني لاوريهم
في يوم و انا قاعده في الشغل و منهمكه بقي في الشغل اصل انا اما شغاله طول الوقت و اما اراجع الكورسات و ازاكرها فتقريبا مش فاضيه خاااالص
وفي مره و انا مركزه براجع ورق الكورس
يعدي واحد دمه خفيف
و يبصلي و يقول
هاهاهاهاهاهاهاها
لهو انتي بتزاكري
و كير كير كير
اطنش و اقول نق بقي اصلها كانت نقصاك انت راخر
قلت ده حاقد و من الاعداء ولازم اخد بالي منه و خصوصا ان الاخ ده كل يوم نتخانق
و نقطع العلاقات
و نسجب السفراء
وبعد العديد من المفاوضات يتم عقد هدنه مؤقته لكي لا يتوقف العمل
الا انه يرمي قنابل من الكلام و صواريح من النيران الصديقه التي تتسبب في رفع ضغطي و بالتالي حرق دمي
فيضرب الدم في نافوخي و كي لا اصاب بالشلل اقوم بزقله بطوبه من الكلام الحاد و التي احيانا بترشق فنقطع العلاقات
و نسحب السفراء
وهكذا يا اخواني
هذا الشخص بيعتبر نفسه مدير عليا
و بيحب يعمل عليا راجل مش عشان هو لاسمح الله بيحبني مثلا
لا ده عشان هو ولد و عايز يعيش انه راجل فبيمارس سلطته عليا
المهم نسيبنا منه دلوقتي
مش موضوعنا
و في يوم كنت قاعده و لقيت مدام فتونه السكرتيره قاعد معاها مهندس جديد و هاتك يا رغي
ودودودو
قمت بقي بحاسه الفضول الي عند كل البنات
انسحبت من لساني و سالت
هو في ايه
و الكلام جاب بعضه وكلمه منه علي كلمه مني
قالي متحاوليش تعرفي بنقول ايه لان فاتك القطر خلاص
بـــــــــــــــــــــــــــــــــــــــــــــــــــــــــــــس
ولعب في عداد عمره
الرد الطبيعي يا جماعه طلع دون ان اشعر
قلتله
قطر لما يهفك
حتي انت
هو انا بقيت ملطشه ولا ايه
هههههههههههههههههههههه
ضحكنا كلنا
ونسينا الموقف بقي
يسكتوا بقي
و الله يا جماعه في يومها قبل ما امشي الاقي زميل عزيز بيسالني
هو ايه اخبارك يا باشمهندسه
الحمد لله علي كل حال
و عامله ايه في الشغل مبسوطه
اه طبعا ماشي الحال
و اخبار الكورس ايه
تمـــــــــــــــــــــــــــــــــــــــــــــــــــــــام
و ايه الجديد عندك
لا جديد
ايه مفيش عريس في السكه
لا و الله كله باوانه (( شوفوا العقل))
انا عارف الرجاله حصل فيهم ايه
((( وقعد ينفخ فيا يا اخواني و قال)))
بنت زي الفل علم ومخ كبير و دم خفيف و زي القمر اللي زيك متقعدش
(((قوم انا اتنفخ بقي و انفش ريشي و اخدت نفس عميق و هزيت راسي و عشت الدور )))
وقلت اصل انا مش هتجوز اي حد انا ليا مواصفات معينه
بـــــــــــــــــــــــــــــــــــــــــس
انا اتنفخت و هو ماسك الدبوس وراح غزني بيه وقال
ايوة فعلا فرصك قليله
اقوله كل شيء نصيب
يقولي ناااادر تلاقي اللي يناسبك
اقوله كله بامر الله
يقولي و نعم بالله لكن صعب
وهكذا يا اخواني
ههههههههههههههههههههههههههههه
و تحول الحوار بيننا هو يندب و انا اصبره
يعني مش كفايه اللي انا فيه
انا نسيت وقفلت الموضوع وركزت في شغلي
و حددت هدفي السامي
وقررت اني لو متجوزتش راجل هنتقم من كل الرجاله
ههههههههههههههههههه
و رسمت خطتي
وحددت هدفي
كيف تنتقمين من الجنس الاخر؟؟؟؟
بالله عليكم مش يستاهلوا
